..
افرجها من رحمتك..!
————-د. خيري السلكاوي
..
متعلقين فيها ..
والناف على روسنا
لا فادنا مين نحرسه ..
ولا مين بيحرسنا
بنروي و المية ..
حالفة ما تلمسنا
والقلب بردك فيه ..
هويس كما ف إسنا
لو يوم وقف نبضه ..
نغرق ف أنفاسنا
حافظ عليه واكرمه ..
واوعاك في يوم تظلمه ..
وتدوقه كاسنا
الناف دا حمله تقيل ..
محبوس وحابسنا
ف اللف و الدوران ..
ملبوس ولابسنا
والمية لو شحت ..
في بير مدارسنا
مين اللي هايعلم ..
يشرح لنا دروسنا
ويلملم اللي اندلق ..
ف سطور كرارسنا
ويقول هانعمل إيه ..
ييجي على مقاسنا
..

• أولها سكة أمل ..
  نرسمها تفرسنا
• تانيها خطة عمل ..
  تاجها على راسنا
• تالتها جرح اندمل ..
  من يوم ما وسوسنا
• رابعها لما اكتمل ..
  الفرح فيه لوصنا
• خامسها ايه العمل ..
  اعمل كما لو كنت ..
  من بنها ف قويسنا
  ..
  م تقوللي يا يسري ..
  لامتى بس الناف ..
  تقله بيخرصنا
  والقلب جوة هويس ..
  قافل على فلوسنا
  مش بس احنا و بس ..
  دة كمان جميع ناسنا
  ايه ذنبنا اننا ..
  على جرحنا دوسنا ..
  يارب ما في سواك ..
  شايف وحاسسنا
  افرجها من رحمتك ..
  تفتح محابسنا ..!
  ..
  افرجها من رحمتك
  تفتح محابسنا ..!
  ..
  بقلم.. د. خيري السلكاوي
  …………..

سلامتك الف سلامة
—————–يسري عثمان
..
سبقتك ياصاحبي
وركبوا البرواز
من الوجع باحبي
مانا قلبي كسر قزاز
ف لملموا المكسور
وفاتوا لي حبه عزاز
ف الدم بتعكر
من كتر ما افكر
م الضغط والسكر
قاموا ركبوا برواز
قلبي اللي كان يوم صبي
سبح بحمد الله
صلي كتير عا النبي
اخر المتمه فاز…!
..
بقلم .. يسري عثمان
…………

براويز ..!
———-د. خيري السلكاوي
..
لملم شبابك وصدق
اننا براويز
متعلقة بفتلة
عالحيطة ما في عزيز
و الدنيا ما بترحمشي
مليانة حب عزيز
في القطر وف طنطا
يحلف بإنه لذيذ..!
واللذة تيجي منين
والقطر ما في ونيس
والمر فيه بيغيظ
عجبي عليك يا زمن
الفرد مالهوش تمن
و سدة الشرايين
في القلب يا صاحبي
بتكسر البراويز
ولكل قلب هويس
لما الهموم تقفله
ولا طن حب عزيز
هايفك بوابته
ويزحزح المتاريس
وانا قلبي كان حاسس
من خيبته انه عريس
ماعرفشي أنه رخيص
الا بضياع نبضه
جرعة امل وبصيص
منها بيتمناه
علشان يعود نبضه
يلملم البراويز …!!
والحمد لك يارب
راضي بنص عريس..!!
..
بقلم .. د. خيري السلكاوي
…………….

الرد كان شافي ..
——————–يسرى عثمان
..
ياللي الحروف لعبتك
ترسمها باقة ورد
اقطف لي من جنتك
كام زهره واكتب رد
انا ياما شلت حمال
و للحمول حمال
لا عمر كان لي عم
و لا انكتب لي خال
ولا لعبت عيال
امي تقول راجل
لاعمري اقول بكرة
و اموري بالعاجل
ولما مال حملي
قام انكسر،، نافي
وانا وحدي دون عيله
ياحملي ياكتافي
دعيت لرب الكون
والرد كان شافي
..
تحياتي ياساحر
الناف : دراع الساقيه

بقلم .. يسري عثمان
………..